Ferðaáætlun
Gönguferð í kringum Lake Windermere
Flug FI 440 kl. 08:00 með Icelandair til Manchester og lent kl. 11:40. Fararstjórar taka á móti hópnum á flugvellinum og við tekur akstur til Bowness-on-Windermere. Gist er á Burn How Garden House allar nætur ferðarinnar.
Gengið að ferjuhöfninni við Bowness. Siglt þaðan yfir þvert vatnið til Ferry House. Þaðan er gengið til Lakeside sem er við suðurenda vatnsins. Þetta er þægileg dagleið þar sem er að mestu gengið við vatnið. Eftir göngu er hægt að fá sér drykk áður en við ökum til baka á hótelið.
Ekið til Gummers How við suðurenda Lake Windermere. Þaðan göngum við til Bowness. Gengið er í gróðursælum hlíðum, mest gengið á skógarstígum og er seinasti spölurinn í nálægð við vatnið. Þar má sjá mikið af glæsilegum húsum og blómaskreyttum görðum Bowness.
Gengið frá hóteli til Windermere sem er stærsti bærinn við vatnið. Þaðan höldum við til Orrest Head, sem er stórkostlegur útsýnisstaður yfir vatnið. Eftir það er gengið um fagurgrænar sveitir til Ambleside. Fáum okkur drykk á sveitakrá áður en við siglum til baka til Bowness.
Gengið frá hóteli niður á ferjuhöfnina. Þaðan er ekið til Ambleside og göngum þar upp Loughrigg Fell og niður til Skelwith Bridge. Eftir nestisstopp tökum við síðasta áfangann í að loka Windermere Way hringnum til Ferry House þar sem við tökum ferjuna yfir til Bowness.
Ekið til Grasmere þar sem lokagangan í ferðinni hefst. Gengið til Ambleside þar sem fólk hefur síðan frjálsan tíma í þeim fallega bæ áður en haldið er heim á hótel.
Það ætti engum að leiðast á frjálsum degi Bowness. Hægt er að skella sér í vatnið og synda, kíkja í verslanir, heimsækja Betrix Potter, Holehird blómagarðinn eða bara hafa það huggulegt á hótelinu Einnig er hægt að fara í dagsferðir í nærliggjandi bæji s.s. Kendal og Keswick.
Ekið frá hóteli á Manchester flugvöll. Flug FI 441 með Icelandair kl. 13:05 og lent kl. 14:50.
Hvað er innifalið
- Áætlunarflug með Icelandair KEF-MAN
- Áætlunarflug með Icelandair MAN-KEF
- Ein taska max 23 kg & 10 kg handfarangur
- Flugvallarskattar
- Gisting í 7 nætur með morgunverði
- 3 kvöldverðir
- Allur akstur samkvæmt dagskrá
- Nesti á göngudögum
- Ferjur
- Íslensk fararstjórn
- Skattar & lögboðin tryggingagjöld í UK
Ekki innifalið
- 4 kvöldverðir
- 3 hádegisverðir
- Drykkir með mat
- Ferðatryggingar
Snorri Guðmundsson
Margrét Snorradóttir
Frábær ferð með frábærri ferðaskrifstofu. Þetta var í fjórða sinn sem ég ferðast með Skotgöngu og það stenst alltaf allt. Fá 12 stig frá mér. Takk fyrir mig.
Gönguleiðirnar eru magnaðar þar sem hver upplifunin tekur við af annarri. Þá er alltaf stuð og stemming í ferðum með Skotgöngu, fararstjórarnir með allt á hreinu og einungis skemmtilegir ferðafélagar fá inngöngu. Takk fyrir mig.
Þægileg ganga með hæfilegum hækkunum og yndisfögru útsýni hvert sem litið er. Siglingin á vatninu alveg upp á 10,5. Greinilega margir sem njóta. Mæli með því að allt gönguáhugafólk prófi ferð með Skotgöngu.
Algengar spurningar
Gönguleiðin í kringum Lake Windermere er að mestu á gróðursælum hlíðum og mikið gengið á skógarstígum, á milli er gengið á malbiki.
Það er ekki hægt að ganga hluta af dagleið en hægt að taka sér frídag hvenær sem er í ferðinni.
Við mælum með að hafa með einhvern gjaldeyri (pund) í ferðina. Á flestum stöðum er hægt að nota kort, en ágætt að hafa með reiðufé t.d. þegar verið er að kaupa drykki.
Ef þið eigið gjaldeyri heima (pund), þá þarf að passa að koma ekki út með seðla sem eru ekki lengur í gildi í UK. Þ.a. ef þið eruð með gamla seðla (bréfpeninga) þá er best að fara með þá í viðskipabankann ykkar og athuga hvort þið getið fengið nýja seðla (plastseðla). Eins hafa einhverjir gestir náð að skipta gömlum seðlum á Keflavíkurflugvelli.
Vegna BREXIT eru reikisamningar ekki lengur í gildi milli Íslands og Bretlands og nauðsynlegt að útvega sér Ferðapakka Vodafone, Símans eða samsvarandi þjónustu hjá viðeigandi símafyrirtækjum fyrir brottför ef nota á netið í símanum utan hótela. Það má gera með símtali eða í gegnum netspjall við símafyrirtæki sitt.
Skotganga (Scot Walks Ltd) er ferðaþjónustufyrirtæki í Skotlandi, UK.
Ef einhver kemst ekki í þá ferð sem viðkomandi hefur bókað í, er ekki hægt að fá endurgreiðslu á innáborgun né færa innáborgun yfir á aðra ferð. Við mælum með því að fólk skoði forfallatryggingar sem tengjast kredikortum sínum eða skaffi sér sérstaka ferðatryggingu.
Það er því miður ekki lengur möguleiki að nota vildarpunkta og gjafabréf í hópbókun með Icelandair. Þeir sem vilja nota vildarpunkta geta valið að kaupa sitt flug sjálfir á heimasíðu Icelandair.
Þátttaka í hópbókun krefst að minnsta kosti 10 farþega. Ef lámarksþáttaka næst ekki, gilda reglur og skilyrði hópsins ekki lengur.
Farangursheimild, ein taska sem vegur 23 kg og handfarangur 10 kg er innifalin.
Hópurinn þarf að hefja ferð saman en farþegar geta breytt heimför gegn breytingargjaldi. Breyting verður að gerast áður en flugmiði er gefinn út.
Ef þátttakandi bókar ferðina með röngu nafni, getur Icelandair krafist nafnabreytingar gegn ákveðnu gjaldi.
Allar breytingar og aðrar fyrirspurnir varðandi flug þurfa að fara í gegnum Skotgöngu, þar sem um hópbókun er að ræða.
Hægt er að kaupa flugið út í hópbókun en ekki er hægt að kaupa flug fyrir heimferð eingöngu. Hægt er að tala við ferðaskrifstofuna (Skotgöngu) með breytingu á heimferð frá öðru landi í þeim tilfellum sem fólk er að ferðast annað eftir ferðina.
Lokagreiðsla á ferð er 10 vikum fyrir brottför. Þátttakendur munu fá tilkynningu þegar kemur að lokagreiðslu.
Næstu ferðir
